SMP-S1 toutes les matières:



السلام عليكم ورحمة الله وبركاته. المهم فهاذ المقال غنحاول نشارك معاكم معلومات على هاذ السوميستر. غتقراو ديكشي ديال الباكالوريا تقريبا كيف ماهو غير كيتعاود بالفرنسية وصافي. ومكيهمش تكون عندك مع اللغة الفرنسية حيت هذو مواد علمية والفرنسية ديالهم اسهل مما تتوقع. فالاول غتجيك شوية صعيبة ولكن من بعد غتجبر بلي المصطلحات كيتعودو وعادي غتولف معاها. راه النص لكبير ديال الطلبة زرق فالفرنسية وكيفاليدي غا بالمونسيو. المهم فهاذ السوميستر غتقراو 7 ديال الموديلات 2 موديلات ديال الفيزياء و 2 ديال الكمياء و 2 ديال الرياضيات وموديل واحد ديال الفرنسية

1- Mécanique du point material

فهاذ الموديل غتقراو ديكشي ديال الفيزياء عاادي جدا. الاسقاطات وكيفاش تحسب السرعة والتسارع ديال واحد النقطة. هاذ الموديل سااهل بزااف واخا كيبان معقد من اول نضرة وكيبالك ديكشي فشكل. ولكن هو من بين اسهل الموديلات اللي كينين خصو غيير شوية دالخدمة. الطلبة غالبا كيفاليديوه من 14 لفوق.

2- Thermodynamique

حتى هو موديل ديال الفيزياء. غير هذا غيجيكم جديد شوية على داكشي اللي قريتوه فالباك. هذا موديل ماصعيب مساهل كيبقا على كل واحد والخدمة ديالو فيه.. غتقراو فيه دراسة الضغط والحجم والحرارة ديال واحد النظام فيزيائي وكيفاش كيخدم محرك ديال شي ماكينة مثلا.. ولكن حتى هو عادي ماشي صعيب غيير خصو التركيز بزااف وصافي حيت فيه التروكوس كيطيحو نهار الامتحان خصكوم تردولهم البال.

3- Analyse 1

هذا موديل ديال الرياضيات كتقراو فيه داكشي ديال الدوال وممحتاجشي بزاف ديال الشرح. ولكن هذا هو اصعب موديل كاين فهاذ السومستر حيت كيتطلب التركيز والخدمة بزااف. كتقريه واحد الاستاذة مزيانة ولكن امتحانات ديالها كتجيبهم مشحطييين غالبا الطلبة كيفاليديوه غابزز.

4- Algebre 1

هذا الموديل الثاني ديال الرياضيات وهو اسهل موديل فالسومستر كتقراو فيه الجبر. كيقريه واحد الاستاذ الله يعمرها سلعة وخا مغدفهمش معاه مزيان فالكور ولكن غير خدم السيري ديالك وفهمها وصافي حيت امتحان كيطيح سااااهل بزااف. كيجي فيه 5 ديال الاسئلة وكل سؤال عليه 4 دالنقاط امتحان تقدر تساليه فربع ساعة اغلب الطلبة كيجيبو 20 فهاذ الموديل.

5- thermochimie

الحلاوة دالخدمة داكشي بسيط وساهل وحتى الاستاذة واعرة بزاف وكتخدم مزيان مع الطلبة. غتقراو فهاذ الموديل التفاعلات الكيميائية محلول حمضي وقاعدي المهم داكشي ديال الباك غير غتقراوه بالفرنسية والسلام. ديما كيتفاليدا بنقطة واعرة

6- Atomistique

style="text-align: right;" هذا الموديل الثاني ديال الكيمياء ولكن هذا خصو التركيز بزااف والخدمة مزيانة ولكن موديل فالمتناول كيقريه واحد الاستاذ كيشرح مزيان اذا كنتي غتحضر معاه غتفهم مزيام وتجيب نقطة مزيانة حتى هذا موديل غالبا الطلبة كيجيبو فيه نقطة مزيانة

7- Lnngue et terminologie.

هذا موديل اغلب الطلبة مكيحضروش الحصص ديالو حيت متما والو كتقراو داكشي ديال الفرنسية ساااهل. وامتحان كيطيح نص واسئلة ديالو. وكيجيو صل بسهم صحيح خطأ ضع علامة بحال هكا وصافي كيجي امتحان ساهل بزااف.



المهم انا حاولت نعطيكم فكرة على كل موديل ومدى الصعوبة ديالو. خصك دعرف بلي هذي اسهل سومستر ودرب فيها نقطة مزيانة. اللي عندو شي سؤال مرحبا يحطو فكمنطير. ولا يتواصل معايا  فالايمايل  والله يوفق الجميع


Et Bon Courage à tous